Click on a word to bring up parses, dictionary entries, and frequency statistics
61.
Nec multo post legiones venere. et terrore famaque
aucti exercitus Vitellianae cohortes nutabant, nullo in bellum
adhortante, multis ad transitionem, qui suas centurias turmasque tradere, donum victori et sibi in posterum gratiam,
certabant. per eos cognitum est Interamnam proximis campis
praesidio quadringentorum equitum teneri. missus extemplo
Varus cum expedita manu paucos repugnantium interfecit;
plures abiectis armis veniam petivere. quidam in castra refugi cuncta formidine implebant, augendo rumoribus virtutem
copiasque hostium, quo amissi praesidii dedecus lenirent.
nec ulla apud Vitellianos flagitii poena, et praemiis defectorum versa fides ac reliquum perfidiae certamen. crebra transfugia tribunorum centurionumque; nam gregarius miles induruerat pro Vitellio, donec Priscus et Alfenus desertis castris
ad Vitellium regressi pudore proditionis cunctos exolverent.
Historiae. Cornelius Tacitus. Charles Dennis Fisher. Clarendon Press. Oxford. 1911.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.